下晝放假本應係好開心, 之但係擒晚太夜訓, 今朝返工又忙到嘔, 仲要做埋d最傷神0既哎0也豬報告, 個頭痛到爆咁濟! 朝早己經係咁"型"住額頭有d興....死,唔通我發燒? 若然去到碼頭唔俾入境點算? 就係咁...去碼頭0既路上馬仔就不停咁摸自己個額頭...

去到碼頭就發覺香港呢面出境好簡單...好彩0者. 但係去到澳門個面就唔係咁話囉.....一大班人要慢行經過紅外線探熱,而對面就有一大堆好似董太0既物體嚴陣以待......

" 我係咪有d發燒呢?"
" 好似係有少少..."
" 過唔到點算呀?"
" 唔會掛..."
" 急緊尿會唔會熱d架?"
" er......."

好啦...終於要過啦...結果...

馬仔俾嬸嬸捉住左呀~~~~ >o<

董嬸: "小姐, 你37點幾度, 麻煩過去做過再詳細d0既探熱呀..."
馬仔: " 下?" (咁大鑊??)

於是, 馬仔就乖乖咁坐埋位, 隔離己經有位兄台晌處探緊熱..

董嬸: "小姐, 我地跟住係會用水銀探熱針同你探腋下"
馬仔: " 下? 咁我實好熱架喎~~" (哎呀...馬仔成日都話, 佢個散熱位係晌刮肋底架嘛..呢次死梗啦..)

D董嬸同隔離個大叔睇先...

"先生, 你有三十八度九喎. 咁麻煩你過去俾我地醫生 詳檢查下..."
( 下? 三十八度九呀? 好驚呀...我會唔會都係呢???? )
" 先生, 三十八度九等如華氏成一百零二度架喇..."
( 嘩...唔知我幾多度呢...入唔到境點算呀~~ )
" 好, 小姐, 到你啦...."
" .........." (好緊張.....用楚楚可憐(扮~)0既眼神望住董嬸嬸...)
" 你係...."
" @_@" (噗通..噗通...)
" 三十七度七......."
" 咁正常係應該幾多度?"
" 水銀探應該係三十六度架咋...拿, 小姐, 你可以走, 但係都要記住有高燒就要去睇醫生...bababa.....:"
"係係係....唔唔唔...."(拿拿臨撇啦~~~)

"我都話急尿會熱d架啦!! >n< "

入到境時又好驚回程時過唔到, 於是乎馬仔全程就係咪搵隻手摸個額頭...

"咦~好似冇咁熱囉喎......." " .咦喂, 好似又熱番喎......... "

死啦....返唔返到香港架???

拎住個地?, 就問下企晌門口個位酒店阿叔點去先...點知..

" 請問舊橋頭點去?"
" 咩嘿咕誇巴呀...." (<-- 阿叔, 你講乜呀?")
" 下???...咁...咩蘇利安圓型地係點去?"
" 嘰喱巴啦嘰哩...." (<- 喂, 完全唔知你講乜喎! 邊處鄉下呀?"
" 下??????????????"
" 咕嚕問嘰喱巴啦出面嘿嘛個人嘩啦." (早講啦~!!)

好彩出面個司機哥哥正常好多, 終於答到馬仔.

原來個地址係應該叫(乙水)仔橋頭峰景餐廳, 嗌乜鬼蘇利安圓形地係冇人識架(撞鬼)~~~ 不過原來講峰景餐廳都已經好多人識架啦~

唔好講咁多, 拿拿聲叫野食先! 仲問? 梗係蟹粥同田雞啦~! 咩話??? 田雞賣晒??? 唔係呀化~~~~ 七點半咋喎!! 有冇搞錯~~ 唔制呀~~ (典地~)

冇辦法, 唯有叫個椒鹽雞翼試下啦...反正馬仔都係想求證下佢d椒鹽係咪真係以前誠昌0個d咁好食...橫樹都係雞0者....呵呵..

好,野食黎啦. 一啖.....嘩!!!!! 好好味呀!!! 兩啖.....係佢啦~係佢啦!!! 三啖.....誠昌呀~~ 返黎啦!!!

D 蟹粥好正呀!! 好多蟹糕呀~~ 好綿啊~~~ D椒鹽....咪就係個隻囉! 噢~~ 人生又充滿返希望啦!! 哇哈哈~....

新0既誠昌舖位大好多, 而且仲有好靚0既view, 坐落都幾舒服. 不過好搞笑, 老闆好明顯係乜鬼都用番原舖0既野, 所以每檯檯面竟然會有一支膠玫瑰...哈...頂癮!